Што е „Синдром на празничо срце“ ?

Асоцијацијата помеѓу алкохолот и појава на нарушување на ритамот на срцето кај здрави личности се нарекува „синдром на празнично срце“ (holiday heart syndrome). Овој тип на синдром за првпат бил забележан кај лица кои што имале епизода на претеран внес на алкохол за време за викенди и празници. Најчест тип на аритмии кои што се јавуваат се суправентрикуларните аритмии, особено атријална фибрилација, и истата се јавува 12 – 36 часа по епизодата на интензивно консумирање на алкохол.

Главната причина за синдромот е прекумерната консумација на алкохол. Сепак, постојат неколку клучни фактори кои можат да ја зголемат веројатноста за развој на овој синдром и тоа:

• Дехидратација: Алкохолот е диуретик (доведува до зголемено мокрење), што води до дехидрираност, која што доведува до промена на електролитниот баланс во организмот и ацидобазниот статус, при што се нарушува микросредината на миоцитети (срцевите клетки) и доведува до појава на аритмија.

• Стрес: Емоционалниот и физичкиот стрес поврзан со планирање на празниците   и прославите може да предизвика аритмии. Дополнително, алкохолот доведува до зголемување на активноста на дел од автономниот нервен систем, наречен симпатикус, којшто фаворизира зголемување на срцевата фрекфенција и предизвикува аритмии.

• Недостаток на сон: Веселбите за време на празниците често го нарушуваат дневно – ноќниот ритам, што доведува до намалување на квалитетот на спиење и на сонот, а тоа придонесува за ризик од развој на артимија, пред сè атријална фибрилација (AFib).