Антибиотиците не се магичен лек: Еве кога навистина ви требаат – а кога не

Замислете: ве боли грло, температура, кашлица... и првата мисла ви е – „Да земам антибиотик, побрзо ќе ми помине“.
Но, дали навистина помага? Не секогаш. Понекогаш – прави поголема штета.

Што се антибиотиците?

Антибиотиците се лекови што убиваат бактерии. Тие не делуваат на вируси – а најчесто токму вируси се причината за настинка, грип или кашлица.
И важно: антибиотиците не спречуваат инфекција – тие само лекуваат ако веќе ја имате, и тоа само ако е од бактерии.

Кога антибиотик навистина помага?

• Кога имате сериозна бактериска инфекција, на пример:
  • воспаление на белите дробови со гнојна слуз
  • гној во увото
  • инфекција на рана
• Откако лекарот ќе направи преглед и евентуално брис (грло или нос) – за да се утврди дали навистина има бактерии

❗Без брис или преглед, не може да се знае дали антибиотикот е потребен!

Кога НЕ треба да се зема?

• За настинка, грип, кашлица, или болка во грло без гној
• „На своја рака“, од пријател или без рецепт
• За секој случај – антибиотикот не е за „превенција“

Што може да се случи ако ги пиете без потреба?

• Ги уништуваат добрите бактерии во телото – што може да доведе до пролив, габична инфекција, или проблеми со варење
• Може да предизвикаат алергиска реакција или осип
• Ви го ослабуваат имунитетот, па лесно може да добиете втора, полоша инфекција
• Ако телото се навикне – следниот пат кога навистина ви треба антибиотик, тој може да не делува.

❗Се почесто има луѓе кај кои никаков антибиотик не помага, бидејќи бактериите станале отпорни. Тоа значи подолги болести, повеќе хоспитализации, па и опасност по живот.

Како да се заштитите?

• Секогаш консултирајте се со лекар – не барајте антибиотик, барајте совет
• Ако добиете антибиотик – земете го точно како што е пропишано, до крај
• Никогаш не земајте антибиотик што останал од порано, или што ви го дал некој друг

Запомнете: Антибиотиците се моќни – но само кога се користат правилно.
Паметна одлука денес значи посилно здравје утре. Не барајте антибиотик – барајте вистинска нега.