Çfarë është fibrilacioni atrial?

Fibrilacioni atrial është një aritmi supraventrikulare, e cila mund të jetë e shpejtë ose e ngadaltë, por gjithmonë e parregullt. Kur zemra funksionon me ritmin e saj normal (ritmi sinus), ajo punon në mënyrë harmonike dhe të rregullt. Gjatë fibrilacionit atrial, atriumet (pjesët e sipërme të zemrës) rrahin në mënyrë të çrregullt dhe kaotike, gjë që çon në një funksionim të parregullt dhe joefektiv të fuqisë pompë të zemrës, duke shkaktuar oksig­jenim të pamjaftueshëm të mushkërive dhe pjesëve të tjera të trupit.

Simptomat e “sindromës së zemrës festive” të lidhura me fibrilacionin atrial

Simptomat e “sindromës së zemrës festive” mund të variojnë nga të lehta deri te të rënda, dhe shpesh përfshijnë:

• Palpitacione: Ndjesi e rrahjeve të shpejta ose të çrregullta të zemrës.
• Dhimbje në kraharor: Parehati ose dhimbje në zonën e kraharorit.
• Marramendje: Ndjesi e marramendjes ose humbje e vetëdijes.
• Vështirësi në frymëmarrje: Vështirësi në frymëmarrje, veçanërisht gjatë aktivitetit fizik
• Lodhje: Lodhje e pazakontë, sidomos gjatë përpjekjeve fizike

Trajtimi i “sindromës së zemrës festive” është i fokusuar në lehtësimin e simptomave dhe parandalimin e komplikimeve. Ai përfshin:

• Modifikimin e stilit të jetesës: Përmes uljes së konsumit të alkoolit, ushqimit të pasur me yndyra të shëndetshme dhe reduktimit të stresit.
• Medikamente: Terapia antikoagulante (përdoret për të ulur rrezikun e formimit të trombeve dhe embolizimit të tyre). Rregullimi i frekuencës së zemrës (beta–bllokues, antagonistë të kalciumit).
• Kardioversioni elektrik: Është një procedurë për rivendosjen e ritmit të zemrës përmes energjisë elektrike..
• Ablacioni: (ose ablacioni me kateter) është një procedurë për shkatërrimin e indit përgjegjës për krijimin e impulseve që shkaktojnë ritëm të shpejtë dhe të parregullt të zemrës.

Fibrilacioni atrial mund të çojë në komplikime serioze nëse nuk zbulohet ose nuk trajtohet.

• Tromb (mpiksje gjaku): Ritmi i parregullt i zemrës çon në krijimin e një rrjedhje turbulente në zemër, duke favorizuar formimin e mpiksjeve të gjakut në një pjesë të zemrës të quajtur zgjatimi i atriumit të majtë. Pjesë të trombit mund të shkëputen dhe të udhëtojnë nëpër gjak drejt pjesëve të tjera të trupit, duke bllokuar rrjedhën e gjakut në organe si truri, mushkëritë, zorrët, shpretka ose veshkat. Fibrilacioni atrial gjithashtu mund të rrisë rrezikun e tromboembolizmit venoz – mpiksje gjaku që formohet në vena.

• Dëmtim kognitiv dhe dementie: Dëmtimi kognitiv dhe dementie, përfshirë sëmundjen e Alzheimerit dhe dementien vaskulare, janë më të shpeshta tek personat me fibrilacion atrial. Shkaku mund të jenë mikro–tromboembolizmet në enët e gjakut të trurit, të cilat çojnë në ulje të rrjedhës së gjakut.

• Dobësi e zemrës: Rreziku për dobësi të zemrës është më i lartë nëse keni fibrilacion atrial, sepse zemra rreh shpejt dhe në mënyrë të parregullt. Ventrikulat nuk mbushen plotësisht me gjak dhe nuk mund të pompojnë mjaftueshëm gjak drejt mushkërive dhe trupit. Fibrilacioni atrial gjithashtu mund të përkeqësojë simptomat ekzistuese të dobësisë së zemrës.

• Goditje në tru (insult): Goditja në tru mund të ndodhë nëse një mpiksje gjaku (tromb) udhëton drejt trurit dhe bllokon një enë gjaku që furnizon trurin. Tek disa persona, fibrilacioni atrial nuk shfaq simptoma, dhe goditja në tru mund të jetë shenja e parë. Gratë me fibrilacion atrial kanë rrezik më të lartë për goditje në tru.

• Ndalesë e zemrës (arrest kardiak): Ndalesa e zemrës (kur zemra papritur dhe në mënyrë të papritur ndalon së punuari) është një dukuri shumë e rrallë, por ka më shumë gjasa të ndodhë në prani të fibrilacionit atrial.