Читање на резултати од радиолошки преглед: Како да ги разберете и што следи понатаму?

Како изгледа радиолошкиот извештај?

• Основни податоци – Вашето име, датум на преглед и вид на направен преглед.
• Дијагноза и клинички податоци – Зошто е направен прегледот (на пр. болка во стомак, повреда и сл.).
• Наод – Опис на тоа што е видено на снимката. Овде се користат медицински термини.
• Импресија (заклучок) – Најважниот дел. Радиологот го сумира она што го смета за најзначајно.
• Препораки – Што да се направи понатаму – контрола, дополнителен преглед или консултација со специјалист.

Што значат поимите во извештајот?

• Нормален преглед – Не се најдени абнормалности.
• Бенигна промена – Нешто што изгледа безопасно (на пр. циста).
• Сомнителна лезија – Промена што треба дополнително да се испита.
• Маса / грутка – Може да биде нешто бенигно или треба дополнителна анализа.
• Инфламаторно – Врзано со воспаление.
• Калцификати – Мали наслаги на калциум, понекогаш нормални, понекогаш знак за нешто друго.

Што да направите кога ќе ги добиете резултатите?

• Не се вознемирувајте. Дури и ако нешто звучи сериозно, најчесто е потребна дополнителна проверка пред да се постави точна дијагноза.
• Контактирајте го вашиот матичен лекар. Тој најдобро ќе ви објасни што значи извештајот во контекст на вашите симптоми и здравје.
• Следете ги препораките. Ако се предлага контрола, дополнителен преглед или консултација со специјалист, важно е да не се одложува.
• Зачувајте ги снимките и извештајот. Може да бидат потребни при идни прегледи за споредба.

Што е итно, а што е битно?

• Итно – Прегледот мора да се направи што е можно побрзо, бидејќи се сомнева на сериозна или акутна состојба што бара брза реакција (на пр. траума, акутна болка, сомнеж за мозочен удар итн.).
• Битно – Прегледот е важен, но може да почека – обично станува збор за хронични состојби или следење на состојби без акутна закана (на пр. болка во ‘рбет или во колено без повреда, мамографија и сл.).
• Вашиот матичен лекар ќе процени дали вашиот случај е итен и ќе ве насочи соодветно.

Колку се чека за различни радиолошки прегледи? 

• Рентген – Може да биде итен. Резултати обично истиот ден или во рок од 7 дена.
• Ултразвук – Може да биде итен. Резултати често истиот ден доколку е итно или во рок од 7 дена.
• Магнетна резонца (МР) Може да биде итна само кај професионални спортисти. Најчесто се чека 2–4 недели.
• Компјутерска томографија (CT) Може да биде итна. Резултати често истиот ден или во рок од 1–2 недели.

Заклучок

• Читањето и разбирањето на резултатите од радиолошки преглед не треба да биде стресно. Со помош на лекарот кој ве упатил – било да е матичен лекар или специјалист – можете да добиете јасна слика за состојбата и за следните чекори.
• Не се вознемирувајте однапред – најголемиот дел од радиолошките наоди не укажуваат на сериозно заболување, туку се дел од дијагностичкиот процес.
• Информирајте се, поставувајте прашања и – најважно – немојте да претпоставувате што значи наодот, туку секогаш следете ги препораките на медицинските професионалци.